E TRAYEKTO PA YEGA NA UN EMBLEMA NOBO

Optimismo, direkshon, union i inspirashon ta nesesario den tempu bon i tempu ménos bon. Ta eseinan ta duna un pueblo speransa, ta motivá nos pa huntu invertí ku pashon, determinashon i amor den desaroyo di nos pais i tur hende ku ta forma parti di e pais. Asina sigur nos por traha riba kresementu di nos Kòrsou.

Den esaki ta importante pa identifiká kiko tur ta laga nos sinti nos mes, di bèrdat, parti di Kòrsou. Ku kiko nos ta identifiká nos mes. Kiko ta hasi nos orguyoso i kon nos ke presentá nos mes na otronan, kiko ta bira nos Emblema Nashonal Nobo. 

Pa e motibu aki, Gobièrnu di Kòrsou a tuma e desishon pa kambia e eskudo aktual di Kòrsou den forma di un trayekto partisipativo. Kiko nos ke men ku un trayekto partisipativo? Tur hende riba 12 aña* por diseñá nan propio emblema ku por bira e Emblema Nashonal di Kòrsou. E hurado, Komishon Emblema Nashonal Kòrsou, ta hasi un promé selekshon di tur diseño ku ta drenta i di eseinan pueblo di Kòrsou por bai vota riba nan diseño preferí. 

Asina henter Kòrsou por partisipá pa nos yega na Un Emblema Nobo.

E TRAYEKTO PA YEGA NA: UN EMBLEMA NOBO

KOMISHON EMBLEMA NASHONAL

Komishon Emblema Nashonal ta asistí Gobièrnu di Kòrsou ku tantu konseho i akshon, pa asina kordiná i sostené e trayekto kaminda ku ta remplasá nos eskudo di Kòrsou aktual pa un Emblema Nashonal nobo. 

Komishon Emblema Nashonal pa Kòrsou ta konsistí di 7 miembro. 

Miembronan di komishon ta selektá a base di un ‘kampaña di solisitut’ ku Gobièrnu di Kòrsou a publiká.

Gobièrnu di Kòrsou a hasi un selekshon anónimo basá riba talentonan, abilidatnan i eksperensia. E proseso akí a forma un kombinashon diverso di individuonan ku amplio konosementu i eksperensia riba área sosial, históriko, ekonómiko, antropológiko, kultural i di struktura estatal, di merkadeo i hurídiko. 

Tarea di e komishon ta pa laga e trayekto pa yega na un Emblema Nashonal Nobo pa Kòrsou, kana na un manera transparente, imparsial i segun kriterianan deliniá.

Klek aki pa mas informashon kon pa partisipá.

PRESELEKSHON: PROSEDURA PA SELEKTÁ TOP 10

Komishon Emblema Nashonal pa Kòrsou ta hasi un preselekshon di un máksimo di 10 finalistá for di diseñonan entregá. Esaki lo tuma lugá di e siguinte forma.

1. Despues ku periodo pa partisipá sera, e komishon ta haña e diseñonan mira pa por duna puntuashon. 
2. Ku eksepshon di e presidente i e sekretario di e komishon: 
   1. e miembronan di e komishon ta haña mira solamente:
      • e diseño; 
      • e splikashon ku ta akompañá e diseño i 
      • e number di e diseño (kada diseño lo haña un number úniko)
   2. Kada miembro di e komishon ta saka nan mes tòp 10 a base di apuntuashon riba e lista di kriteria di evaluashon (promé ròndu di selekshon interno).
   3. Despues ku kada miembro a saka nan tòp 10, e presidente i e sekretario ta kontrolá si tin diseño ku tur miembro a selektá.
   4. A kaso tin mas ku 10 diseño igual ku tur miembro a selektá, e sobrá diseñonan ta kai afó. Miembronan di KENK lo hasi un segundo selekshon, a base di mas ku 10 diseñonan igual, pa selektá un tòp 10.
   5. A kaso di tin ménos ku 10 diseño igual ku tur e miembronan a selektá, outomatikamente e diseñonan igual lo forma parti di e tòp 10.
      Miembronan di e komishon ta bolbe saka nan tòp 10 a base di apuntuashon riba e lista di kriteria di evaluashon. E biaha aki no por ‘score’ di nobo pa e diseňonan ku ya kaba tabata den  tòp 10 personal den e promé ròndu.
3. A kaso a base di e diferente ròndu di preselekshon e komishon no a logra yega na un tòp 10, ta trata di yega na un konsenso òf vota riba e diseñonan preselektá pa yega na un tòp 10.  
4. KENK ta konektá e 10 finalistanan ku diseñadónan profesional pa prepará òf profesionalisá nan diseño (si ta nesesario) di tal forma ku por presentá e diseñonan na públiko.
5. Ta publiká e tòp 10 di diseňo, pa públiko skohe un tòp 3.