Nos emblema nobo mester ta rekonosibel, unda ku bo bira i den kualke forma ku e ta repliká. E mester ta fásil pa ahustá den diferente tamaño. Mester por usé por ehèmpel riba ‘pin’ chikitu, pero tambe riba un  ‘billboard’ inmenso.

Nos emblema por tin un máksimo di 15 koló. Tene kuenta ku e emblemanan mas konosí i rekonosé ta netamente esnan ku tin ménos koló. Mester por usé tambe den pretu ku blanku. 

Komo símbolo nashonal nos emblema ta reflehá nos komo nashon. E por ta konotá ku e elementonan karakterístiko lokal manera bestia, vegetashon, arkitektura, kultura i òf lokalidat; basta e ta algu ku TA KÒRSOU. Tambe e por reflehá e lucha ku a edifiká nos komo nashon, nos presente i nos perspektiva riba un futuro briante. 

Nos nashon meresé un emblema úniko, sin símbolonan di partido polítiko ni di gruponan di interes. E mester bai pa historia i konbibí ku nos di generashon pa generashon. 

Kada siudadano mester por sinti su mes identifiká i inspirá dor di nos emblema. Méskos ku nos himno i nos bandera ta pone nos sinti. 

Pa duna e diseño mas forsa, por añadí un teksto (slogan òf mòto) ku ta duna nifikashon na e elementonan inkluí. Sinembargo, esaki mester ta den nos idioma nashonal papiamentu.

Banda di bo emblema, bo mester manda tambe un splikashon di bo diseño. Inkluí nifikashon di kada elemento, símbolo i koló usá den bo diseño i kiko nan ta simbolisá.

E emblema nobo mester bira unu ku ta motivá nos i ku ta reflehá optimismo. Nos mester por sinti nos mes identifiká kuné, meskos ku na momentu di nos himno i bandera. Wak e siguiente videonan pa inspirashon.