|
Ora un Yu di Kòrsou (por ehèmpel den eksterior) ta pensa bèk na Kòrsou, nan ta pensa ku:
- 1. Serka famia i amigunan semper nan por haña e amor ku nos tur meresé
- 2. Semper tin pas na Kòrsou i mayoria biaha nos ta bai bon ku otro
No tin guera òf kalamidatnan di naturalesa manera otro paisnan si tin.
- 3. E kalor di kas ta nos hendenan i alabes e kalor ku ta hasi na Kòrsou.
Kolornan usá ta:
Hel i oraño: Pa simbolisá Kòrsou su solo i temperatura
Blou klá: Pa simbolisá Kòrsou su shelu i awanan blou i briyante
Blou skur: Pa simbolisá Kòrsou su laman ku ta rondon’é i alabes koló di bandera
Bèrdè: Pa simbolisá Kòrsou su naturalesa
Blanku: Pa simbolisá Kòrsou su nubianan i e pas ku tin semper na Kòrsou
Elementonan usá ta:
Rayonan di solo
Promé elemento ku bo ta wak ku ta mas prominente den e emblema. Ora bo pensa riba Kòrsou, e promé kos ta su solo i kalor. E rayonan ta simbolisá nos kultura amabel i kalor di klima i habitantenan.
Olanan di bientu
Na di dos lugá e olanan di bientu ku ta supla riba nos isla. E ta supla i pasa riba Kòrsou su shelu, naturalesa i laman. Ounke ta hasi kalor, no tin nada mas dushi ku e bientu ku ta supla ku regularidat.
Puntanan di kompas
E puntanan di kompas den e rayonan di solo ta pa ilustrá ku unda ku bo ta rònt mundu, bo ta pensa riba Kòrsou su solo i kalor. Tambe ku nos poblashon a krese for di diferente nashonalidat.
Liña di arkitektura
E liña blanku den e área blou klá ta nos arkitektura ku ta bini bèk den nos sentro di siudat i ta rekonosibel rònt mundu.
Dos streanan di nos bandera
E dos streanan ta di nos bandera i ta ilustrá Kòrsou i Klein Kòrsou den e laman blou.
|
