Naturalesa ta Kòrsou

E emblema akí ta representá naturalesa di Kòrsou komo parti di nos identidat natural i ta karga alabes un mensahe di kresementu infinito di nos pais.

E sírkulo ta ilustrá e parti infinito i ta simbolisá nos pueblo den su totalidat. Nos pueblo ku ta hasi esfuerso pa alsa i karga nos pais.

Komo tal nos pais ta den laira i ta karga e koló blou di shelu.

Mas abou tin nos awanan limpi blou ku nos ta orguyoso di landa aden i ta invitá turistanan bin konosé. Mei mei di e emblema tin e palu di Kibrahacha, ku ta karga flornan nashonal di Kòrsou. Flornan hel komo legria di nos pueblo. Alabes e koló di e solo ku ta kima ku furia riba nos pais. E stam i raís ta asina presente pasó e raís ta e loke ta tene nos fundeshi i nos pueblo huntu. E palu den su totalidat ta representá kargamentu. Raís ta karga stam, stam ta karga taki, taki ta karga flor. Den nos pais, apesar di tur desafío, kada bes di nobo nos ta demostrá di ta karga ku i karga otro.

Na banda robes i drechi tin e blachinan di nos palu nashonal, Divi-Divi, ku nan koló bèrdè, kual ta para pa kresementu i speransa. Kresementu den tur sentido di palabra. Den e kaso akí pa nos ekspandé komo pais chikí den un mundu grandi. I speransa pa un kresementu total di nos pais.