|
Edifisio
E edifisio ta representá e arkitektura nativo di Kòrsou ku yama “Curaçao Baroque”; e karekterístikanan di e sorto di edifisionan akí ta liñanan kursivo i yalusí. Mi a usa komo referensia e edifisio di Penha.
E blenchi
Mi a kis e blenchi pasó ami ta haña ku e ta e bestia di mas bunita ku ta biba na Kòrsou. Mi ta haña ta di lamenta sí ku nos no ta mira esaki hopi mas. E blenchi den e emblema ta simbolisá nos pueblo i isla kompletu. Esaki komo ku e ta chikí, pero tambe resiliente i e ta traha duru pa logra su meta. Blenchi tambe tin nifikashon positivo, esakinan ta: alegria, bida i klaridat ku ta reflehá nos pueblo.
E solo
E solo den nos emblema tambe tin un nifikashon importante.
Por mira e manera ku e ta bria riba e blenchi literalmente ya ku sa ta hopi kayente aki na Kòrsou, pero tambe por mir'é manera pueblo ta keda bendishoná of iluminá. Tambe mi a hasi e solo un koló mas fuerte pa mustra ku e solo ta duna nos poder tambe. E solo tambe ta sali na horizonte; esaki ta nifiká un era nobo i un futuro briante pa nos pueblo.
E laman
Mi a pone aserka e laman ya ku esaki tambe ta un di e karakterístikanan di mas importante aki na Kòrsou. Laman tambe tin nifikashon postivo manera pas di alma.
E lema
Nos lema ta: “Un pueblo iluminá, ku un solo meta pa avansá."
E lema akí ta mas basá riba e solo riba e emblema. Ku iluminá mi kiermen ku nos ta keda bendishoná, pero tambe ku nos ta haña poder. Komo ku ta di e bendishon i e podernan akí nos por kana bai dilanti. Mientrastantu e solo ta iluminá, Kòrsou lo sigui biba i sigui move pa dilanti.
|
