Nos Fortalesa

Alegria, forsa i dinamismo ta e palabranan ku pa ami ta deskribí nos isla Kòrsou mihó. I Kòrsou pa ami ta su hendenan, su naturalesa i kultura. Tur e rikesanan akí huntu ta forma nos identidat i ta fortalesé nos komo pueblo i komo isla. Tur e rikesanan akí huntu ta nos fortalesa, i Kòrsou ta nos fortalesa. P’esei esaki ta e título di mi diseño pa emblema di Kòrsou.

Mi diseño ta pintá na man i ta kontené formanan prinsipalmente orgániko. P’ami esaki ta simbolisá kresementu i flèksibilidat. Mi palèt di koló ta alegre i yamativo, i tin un kombinashon di pretu ku blanku.

Naturalesa: Solo i laman
Un bunita frase di nos himno ta bisa: “I ora nos ta leu fo’i kas nos tur ta rekordá Kòrsou, su solo i playanan, orguyo di nos tur”. Nos solo i laman ta nos orguyo, nos fuente di kalor i legria ku ta duna nos isla bida, tambe un enkanto pa tur turista ku bishitá nos isla. E legria i bida ta resaltá tambe den mi eskoho pa duna tur loke ta rònt di e solo koló.

Ademas, mi ta kompar’é ku kurason di un ser humano; danki na dje e kurpa tin bida i por sigui funshoná. E komparashon ku e kurason tambe bo ta mira den e posishon na man robes di e solo. Alabes esaki ta trese un bunita kontraste den e diseño.

Naturalesa: Datu i flamboyan
Nos naturalesa konosé flora i founa karakterístiko i algun asta endémiko. Nos tin para, piská i otro bestia típiko i mashá konosí, meskos tambe nos kadushi i datu, milon di seru i diferente otro palu, mata i yerba. Pa ami esun ku ta mas rekonosibel i outéntiko ta e datu i e flamboyan. E datu ta para firme riba su kurpa, e ta emití konfiansa i ta sigur di su mes. Meskos ku e Yu di Kòrsou. E flamboyan ku su kolónan i su grandesa tambe ta marka su presensia i eksigí rèspèt. P’esei ámbos a haña nan lugá den mi diseño.

Kultura: Fachada, kas di kunuku i tambú
Kultura tin un definishon amplio. Pa ami kultura ta e forma ku nos ta ekspresá nos mes, nos manera di biba, nos kustumbernan, nos manera di pensa, i tambe nos arkitektura, nos músika, nos kuminda i hopi mas. Un di e forma mas rekonosibel di kultura tangibel ta nos arkitektura, espesialmente nos edifisionan. Pa e motibu ei mi a skohe un fachada ku un bentana. Den e fachada bo por mira nos pasado; un herensia di nos pasado kolonial ku apesar di tabata doloroso, ta parti di nos kultura i identidat. E bentana mi ta mira komo símbulo di nos futuro. E kas di kunuku tambe ta algu úniko di nos kultura ku ta para pa nos historia tangibel.

E tambúnan ta pará tantu pa nos kultura komo pa nos pueblo. Den dje bo por mira nos kreatividat i kon ingenioso nos ta komo pueblo. E tambú, un instrumènt típiko di Kòrsou, mi ta enkantá ku kon nos ta tok’é. E brasa fuerte ku ta dominá e kueru i e kreatividat di nos hendenan pa krea un instrumènt ku loke tabatin na nan disposishon, ta algu di atmirá. Tambe ta parti di nos kultura.

Hende: Forma di Kòrsou, moketa i horizonte
Kòrsou lo no ta Kòrsou sin su pueblo. Su hendenan ku a pasa den hopi kos i ku semper a sa di sigui pa dilanti. For di tempu di sklabitut te ku awor tin diferente momentu ku nos por usa komo ehèmpel di nos lucha. Por ehèmpel e lantamentu bou di guia di Tula, wèlga bou di guia di Chakutoe i 30 di mei. Nos pueblo tin su lucha, nos ta sigui krese, nos ta kreativo, nos ta resiliente, nos ta fuerte. P’esei mi a opta pa integrá forma di nos isla den mi diseño. Pa tur loke Kòrsou ta para p’é ta bon representá den e diseño. Pa ami un manera bunita pa rekonosementu i aseptashon total di su beyesa. E moketa i horizonte ta base firme di nos lucha. El a hasi nos fuerte. símbulo di kon resiliente nos ta. E posishon den diseño abou ta riba un horizonte estrecho, esaki ta símbulo di posibilidat. Nos ta un isla habrí pa posibilidat i kresementu i mundu kompletu ta bon biní, nos ta habrí pa otro kultura, semper den harmonia ku nos propio kultura. Tur e rikesanan akí huntu ta nos fortalesa, Kòrsou ta nos fortalesa.